“NDOCHI” N’ỤTỌASỤSỤ IGBO

Abstract

Isiokwu nchọcha a bụ “Ndochi n’Ụtọasụsụ Igbo” na ụdị ya dị iche iche na etu o si apụta ihe n’ahịrịokwu. “Ndochi” bụ mgbe e ji okwu wee nọchite okwu ọzọ n’ahịrịokwu. Nwanchọcha chọpụtara mkpa ọ dị iji atụ dị iche iche wee kọwaa ụdị ndochi e nwegasịrị n’ụtọasụsụ Igbo. Ọtụtụ mgbe, ndị mmadụ na-eche na “ndochi” na nkwubiri bụ otu mana ha abụghị. Ọ bụ ụdị nghọtahie a kpalitere mmụọ nwanchọcha ime nchọcha n’isiokwu a. Ọ bụ usoro nkọwasị ka a gbasoro wee mee nchọcha a. E webatara atụtụ ụtọasụsụ mgbanwe iji wee nyochaa usoro ndokọokwu dị iche iche nke na-egosi ka “ndochi” si apụta ihe n’ụtọasụsụ Igbo. Nwanchọcha chọpụtara ụdị “ndochi” dị iche iche dị ka “ndochi” ngwaa, “ndochi” mkpọaha na “ndochi” nkebiahịrị, na etu e si eji ha ewube ahịrịokwu. A tụrụ anya na nchọcha a ga-enyere onye maọbụ ndị ọzọ ga-eme nchọcha n’isiokwu a aka n’ọdịniihu. Ọ ga-eme ka onye ọbụla gụrụ ya mụta ọtụtụ ihe dị iche iche gbasara “ndochi” n’ụtọasụsụ Igbo. Nwanchọcha na-atụnye aro ka ndị mmadụ nabata ma gosi mmasị ịga n’ihu ime nchọcha miri emi n’isiokwu a bụ “ndochi” n’ụtọasụsụ Igbo ma bipụta ya n’akwụkwọ ka onye ọ masịrị gụọ ka owee beleta nhịaahụ ndị na-eme nchọcha n’ide isiokwu a na-ezute n’oge ugbu a.